ചെങ്ങന്നൂർ: വിൽപ്പനയ്ക്കായി എത്തിച്ച 8.89 ഗ്രാം ഹെറോയിനുമായി പശ്ചിമ ബംഗാൾ സ്വദേശിയെ ചെങ്ങന്നൂർ പോലീസ് പിടികൂടി. പശ്ചിമ ബംഗാൾ മാൾഡ സ്വദേശി മോക്കിം (35) ആണ് അറസ്റ്റിലായത്. ചെങ്ങന്നൂർ റെയിൽവേ സ്റ്റേഷൻ പരിസരത്തു നിന്നാണ് ഇയാളെ പോലീസ് സംഘം വലയിലാക്കിയത്.
സംസ്ഥാനമൊട്ടാകെ പോലീസ് നടത്തുന്ന ഓപ്പറേഷൻ തൂഫാൻ നടപടികളുടെ ഭാഗമായി ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. കേരളത്തിലെ ആവശ്യക്കാർക്ക് ചെറുകിട വിൽപ്പന നടത്തുന്നതിനായി സ്വന്തം നാടായ മാൾഡയിൽ നിന്നാണ് ലഹരിമരുന്ന് എത്തിച്ചതെന്ന് പ്രതി പോലീസിനോട് പറഞ്ഞു.
ആലപ്പുഴ ജില്ലാ പോലീസ് മേധാവി ടി.കെ വിഷ്ണു പ്രദീപിന്റെ നിർദേശാനുസരണം ചെങ്ങന്നൂർ ഡിവൈഎസ്പി. സന്തോഷ് കുമാറിന്റെ മേൽനോട്ടത്തിൽ ഇൻസ്പെക്ടർ എസ് എച്ച്ഒ രഗീഷ് കുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
എസ്.ഐ. പ്രദീപ് ചന്ദ്രൻ, എഎസ്ഐ ഹരികുമാർ, സിവിൽ പോലീസ് ഓഫീസർമാരായ അരുൺ പാലയുഴം, അനി, മിഥ്ലാജ്, ഹരീഷ് കുമാർ, വിബിൻ കെ. ദാസ്, ഹർഷകുമാർ എന്നിവരും ജില്ലാ ഡാൻസാഫ് ടീം അംഗങ്ങളും അന്വേഷണ സംഘത്തിലുണ്ടായിരുന്നു
